Umuyobozi Nshingwabikorwa w’Akarere ka Nyarugenge Wungirije, Madamu Uwamahoro Geneviève yifatanyije n’abaturage b’umurenge wa Kanyinya kuri uyu wa 15 Ukwakira 2024 mu kwizihiza Umunsi Mpuzamahanga wahariwe Umugore wo mu Cyaro ku nsanganyamatsiko igira iti: “Ibidukikije: Ubuzima bwacu”. Uyu munsi wizihirijwe mu murenge wa Kanyinya mu gihe 85% by’abatuye uyu murenge bakora ubuhinzi n’ubworozi

Iki gikorwa cyaranzwe no guha imbuto abagore b’amikoro make kugira ngo batangire ihinga ry’Igihembwe 2025A cyane ko imvura yatangiye kugwa. Abagore 4 borojwe inka muri gahunda ya Girinka Munyarwanda bikazatuma imiryango yabo itera imbere.

Umuhuzabikorwa w’Inama y’Igihugu y’Abagire (CNF) mu karere ka Nyarugenge Madamu Agatesi Marie Laétitia Mugabo yagarutse ku ruhare rw’Umugore mu iterambere ry’umuryango ndetse n’igihugu muri rusange. Yasabye abagore kugira uruhare mu kurengera ibidukukikije nk’uko isanganyamatsiko y’uyu munsi ibivuga, asaba abagore gukora bakiteza imbere kuko iyo umugore ateye imbere n’umuryango we utera imbere ndetse n’Igihugu bikaba uko.

Umuyobozi Nshingwabikorwa w’Akarere Wungirije yasabye abagore n’abandi baturage kurengera ibidukikije birinda gutwika ibiyorero no kurengera urusobe rw’ibinyabuzima. Yavuze ko abagore bafite uruhare runini mu kurengera ibidukikije bakoresha amashyiga ya rondereza mu rwego rwo kugabanya inkwi mu kurengera amashyamba. Yasabye abaturage kongera amashyamba bagatera ibiti batibagiwe n’ibiti by’imbuto ziribwa. Yasoje abasaba gukomeza umuco w’Isuku kugira ngo bagire ubuzima bwiza.