Kuri uyu wa gatanu tariki ya 19 Nzeri 2025, mu Murenge wa Kanyinya, Akagali ka Taba, kuri site ya MAGERWA, Bwana Ingangare Alexis, Umuyobozi Nshingwabikorwa w’Akarere ka Nyarugenge yatangije  igihembwe cy’ihinga cya 2026A haterwa igihingwa cy’ibishyimbo ku butaka bufite ubuso bungana na Ha 3 mu rwego rwo gushishikariza abahinzi guhinga mu buryo bwa kijyambere kandi  ku gihe mu rwego rwo kongera umusaruro w’icyo gihingwa.

Iyi Site ya MAGERWA ni imwe muri sites za FOBASI (Food Basket Sites) dufite mu Karere ka Nyarugenge ikaba ihingwaho by’Umwihariko na Koperative TERA IMBERE MUHINZI y’Abajyanama b’Ubuhinzi.

Muri rusange SITE za FOBASI zose hamwe zizahingwaho ni site 10 ziri ku buso bwose hamwe bungana na Ha 86 zikaba ziherereye mu Mirenge ya Nyamirambo, Kanyinya, Kigali na Mageragere.

Umuyobozi Nshingwabikorwa w’Akarere yasabye abahinzi guhingira ku gihe: aha abahinzi basabwe gutegura neza kandi vuba imirima yabo kugira ngo badacikanwa n’iki gihembwe cy’ihinga cya 2026A.

Muri Gahunda yo Guhuza ubutaka hahingwa igihingwa cyatoranijwe (Land consolidation Program) mu Karere ka Nyarugenge hazahingwa: 

• Ibigori: Ku butaka buhuje bungana na Ha 50
• Ibishyimbo: Ku butaka buhuje bungana na Ha 206
• Imboga: Ku butaka buhuje mu bishanga bungana na Ha 120 

Ikindi, abahinzi basabwe gukoresha inyongeramusaruro (ifumbire y’imborera ndetse n’ifumbire mvaruganda hamwe n’imbuto z’indobanure) cyane ko Leta yashyizemo NKUNGANIRE. 

Abahinzi kandi banashishikarijwe kwiyandikisha muri SMART NKUNGANIRE (SNS) kugira ngo babashe kugura inyongeramusaruro zunganiye (subsidized seeds & Fertilizers). 

Muri rusange mu Karere ka Nyarugenge iki gihembwe hazakoreshwa:

•Imbuto y’ibigori y’indobanure (Maize Seeds) ingana na toni 8

• Ifumbire ya DAP ingana na toni 12
• Ifumbire ya UREA ingana na toni 28
• Ifumbire ya NPK ingana na toni 4 

Mu Karere ka Nyarugenge hazashyirwa mu mu bwishingizi ibihingwa (ibishyimbo, Ibigori, umuceri, urusenda, soya, …) hamwe n’amatungo (inka, inkoko, ingurube…)  kuko n’ibishyimbo byashyizwe mu bigomba kwishyingirwa

Muri uyu mwaka w’Imihigo 2025-2026 tuzashyira mu bwishingizi:

•Ibigori: 5 Ha (Koperative URUMULI mu gishanga cya Nyarufunzo)

•Inka: 103

•Ingurube: 26

•Inkoko: 2,000

Kuhira imyaka aho bishoboka kuko Leta yunganira abahinzi kuri 50% ku giciro cy’ibikoresho byo kuhira.

Kurwanya isuri mu mirima hacukurwa ibyobo bifata amazi mu mirima no gutera ibiti bivangwa n’imyaka.

Gukingiza amatungo tuyarinda indwara z’ibyorezo zitandukanye. (Ubutaka, igifuruto, amakore, ubuganga ndetse n’ibisazi by’imbwa n’injangwe).

•Muri uyu mwaka w’Imihigo 2025-2026 tuzakingira:

- Ubutaka (BQ): inka 3,250

- Igifuruto (LSD): inka 3,250

- Amakore (Brucellosis): inka 400

- Ubuganga (RVF): inka 3,250

-Muryamo (PPR): ihene 4,000

-Muryamo (PPR): intama 100

-Ibisazi by’imbwa n’injangwe: imbwa n’injangwe 500 

Guteza intanga inka kugira ngo zirusheho kongera umukamo  (Kuvugurura amaraso y’inka zitanga umukamo).

•Hazaterwa intanga inka 600

•Hazabarurwa inyana 200 zavutse ku nka zatewe intanga

Gahunda ya GIRINKA aho tuzatanga inka 80. 

•Aborozi barashishikarizwa kwitabira Gahunda yo kwiturana bijyanye na Gahunda ya Girinka Munyarwanda.

•Kutagurisha inka bahawe muri Gahunda ya Girinka (ntawemerewe kuzimya igicaniro).