Abadepite babiri aribo Hon. Karemera Emmanuel na Hon. Niwemahoro Wassila bari mu mahuriro abiri ariyo ihuriro ry’Abanyarwandakazi bari mu Nteko Ishinga Amategeko (FFRP) hamwe n’Ihuriro ry’Abagize Inteko Ishinga Amategeko baharanira Imibereho myiza y’Abaturage n’Itermabere (RPRPD) mu mpera z’icyumweru gishize basuye Akarere kacu ka Nyarugenge mu gikorwa cy’ubukangurambaga bwo kumenyekanisha Itegeko N^o 71/2024 ryo ku wa 26/06/2024 rigenga abantu n’umuryango hamwe n’ubukangurambaga mu rubyiruko ku kwitabira serivisi zijyanye n’ubuzima bw’imyororokere no kwirinda inda zitateganyijwe.

Nyuma yo guhura n’abayobozi mu Karere ka Nyarugenge n’abayobozi b’Imirenge ikagize ndetse n’abizindi nzego zikorera mu Karere, abo badepite basuye ahankurikira:

• Isange One Stop Center Muhima
• Ikigo Nderabuzima cya Cor Unum mu Murenge wa Kimisagara
• Ikigo cy’Urubyiruko cya Kimisagara
• Bitabiriye Inteko z’Abaturage mu Murenge wa Nyakabanda
• Baganiriye n’Abanyeshuri bo muri College Saint Andre 

Umuyobozi Nshingwabikorwa w’Akarere ka Nyarugenge Wungirije, Madamu Uwamahoro Genevieve yabahaye ikaze avuga ko uruzinduko rwabo ari ingirakamaro mu gutanga uruhare rwabo mu iterambere ry’akarere no gukora ubuvugizi ku bibazo byakemurwa ku bufatanye n’izindi nzego.

Muri make Abadepite bibanze ku ngingo zikurikira:

• Gusobanurira abaturage iby’ingenzi bikubiye mu itegeko rigenga abantu n’umuryango
• Gukangurira urubyiruko kwirinda ingeso zishobora kubangamira ejo hazaza harwo
• Gukomeza ubufatanye mu kurwanya ihohoterwa n’amakimbirane mu miryango
• Kwakira ibibazo, ibitekerezo n’ibyifuzo by’abaturage