Inteko Rusange y’ihuriro ry’Abafatanyabikorwa mu iterambere ry’Akarere ka Nyarugenge (JADF) yarateranye maze abayigize baganira ku bikorwa biteganyijwe mu mihigo y’Akarere y’Umwaka w’Ingengo y’Imari 2025-2026 n’uruhare bazayigiramo. 

Iki gikorwa cyitabiriwe n’Umuyobozi Nshingwabikorwa w’Akarere ka Nyarugenge, Bwana Ingangare Alexis, Umuyobozi Nshingwabikorwa w’Akarere wungirije Madamu Uwamahoro Genevieve, Perezida wa JADF Nyarugenge Bwana Alain Numa n’abandi bafatanyabikorwa.

Perezida w’Ihuriro ry’Abafatanyabikorwa mu iterambere ry’Akarere ka Nyarugenge (JADF), Bwana Alain Numa yashimiye abafatanyabikorwa b’Akarere kuko mu mwaka ushize bakoreheje miliyari zirenga 4 mu bikorwa by’imihigo y’Akarere bigamije iterambere ry’abaturage. 

Umuyobozi Nshingwabikorwa w’Akarere ka Nyarugenge Bwana Ingangare Alexis yashimiye Abafatanyabikorwa b’Akarere ku ruhare bagize mu iterambere ryako mu nzego zose zirimo ubukungu, imibereho myiza y’abaturage n’izindi. Yabasabye kudatezuka ku guharanira imibereho myiza y’abaturage agaruka ku bufatanye mu kurwanya igwingira ry’abana n’imirire mibi, kurwanya amakimbirane mu miryango, kurwanya ubuzererezi mu bana, gukomeza kubakira abatishoboye, kubafasha kubona ubwisungane mu kwivuza, kuboroza muri gahunda ya ‘Girinka’n’ibindi.

IBIZAKORWA UYU MWAKA

• Gukura abaturage mu bukene
• Gusana inzu z’abatishoboye
• Kubakira ubwiherero abatabufite cyangwa abafite ubumeze nabi
• Kubakira utugari tugikodesha mu rwego rwo kunoza mitangire ya serivisi
• Gushakira ibisubizo ikibazo cy’abana b’inzererezi
• Kurwanya imirire mibi n’igwingira ry’abana
• Kuzamura ireme ry’uburezi
• Kubaka umuryango utekanye hirindwa amakimbirane
• Gukomeza kwegereza amazi abaturage bo mu Mirenge y’Icyaro