Hatangiye amahugurwa y'iminsi 3 agenewe abajyanama 50 bagize Inama Njyanama ziheruka gutorwa mu Mirenge ya Nyarugenge na Muhima. Aya mahugurwa yatangiye taliki ya 19 Ugushyingo akazarangira 21 Ugushyingo 2021 yateguwe ku bufatanye n’ikigo Citizen Rights and Development (CRD) ndetse na Never Again Rwanda. Ayo mahugurwa  azibanda ku mategeko ajyanye n'inshingano zabo no kurengera uburenganzira bwa Muntu.

Atangiza amahugurwa, Bwana Emmy Ngabonziza, Umuyobozi Nshingwabikorwa w’akarere ka Nyarugenge yabahaye ikaze ndetse abashimira umuco w’ubwitange bagaragaje biyemeza gufasha imirenge yabo nk’abajyanama. Yabasabye gukorana neza, guharanira kuzuza inshingano zabo ndetse ababwira ko akarere kabatezeho byinshi biganisha ku iterambere no gusigasira ibyagezweho bikubiye mu nkingi 4 arizo:

• Imibereho myiza
• Ubukungu
• Imiyoborere myiza
• Ubutabera