Umuyobozi Nshingwabikorwa w’Akarere ka Nyarugenge Bwana Ngabonziza Emmy kuri uyu wa gatanu tariki ya 21 Mutarama 2022 yayoboye igikorwa cy’ihererekanyabubasha hagati ya Komite y’Inama y’Igihugu y’Abagore (CNF) mu karere ka Nyarugenge iherutse gutorwa ndetse n’icyuye igihe.

Madamu Mutoni Theddy.wari umuhuzabikorwa wa CNF icyuye igihe yashimiye ubuyobozi bw’Akarere ku mikoranire myiza ndetse anasaba ko iyo mikoranire myiza yakomeza no kuri komite iherutse gutorwa.

Madamu Agatesi Mugabo Marie Laetitia watorewe kuyobora Inama y’Igihugu y’Abagore yahereye ku mugani uvuga ngo “Abishyize hamwe ntakibananira” abwira komite icyuye igihe ko bazakomeza gukenera ubunararibonye bwabo.

Umunyamabanga Nshingwabikorwa w’Akarere ka Nyarugenge Bwana Ngabonziza Emmy yashimiye komite icyuye igihe, asaba komite nshya kwita ku gukemura ibibazo byugarije umuryango bigaragara mu karere birimo:

• Guharanira ibyateza imbere umuryango muri rusange
• Gukemura ikibazo cy’imirire mibi n’igwingira mu bana
• Gukomeza ubukangurambaga bugamije guca burundu ihohoterwa iryo ariryo ryose
• Gukumira ko habaho abana bata ishuri
• Gufasha mu kubaka uturima tw’igikoni aho bishoboka n’ibindi.

Yagaragaje ko nk’Ubuyobozi bw’Akarere biteguye gukomeza gufasha Komite yatowe mu ishyirwa mu bikorwa ry’ibikorwa biyemeje no gukorera hamwe hagamijwe kuzamura imibereho myiza y’Umugore n’umuryango muri rusange.