Mu Karere ka Nyarugenge mu Imbuga City walk, Umuyobozi Nshingwabikorwa w'Akarere, Bwana Ngabonziza Emmy yatangije icyumweru cyo kuzigama gifite insanganyamatsiko igira iti "Twiyubakire Ejo Heza twizigamira". Muri iki gikorwa cyabaye tariki ya 01/11/2022  hari abakozi ba RSSB bari bayobowe na Bwana Gatera Augustin, Umuyobozi wa gahunda ya Ejo Heza muri RSSB habayeho kwakira abaturage biyandikishaga bakanizigamira.

Ubushakashatsi bwa MINECOFIN 2020 bwerekanye ko 86% ku bakuze ( Imyaka 16 kuzamura) bizigamira hakaba harimo abizigamira mu buryo bw'itegeko ( Ibigo bizwi) bavuye kuri 49% muri 2016 bagera kuri 54%  muri 2020 naho Ibigo bitanditse ( informal sector) bavuye kuri 56% muri 2016 bagera kuri 64%.

Ibikorwa by'ubukangurambaga bizakomereza mu Mirenge yose y'Akarere ka Nyarugenge ku nyito y"Isibo igicumbi cya Ejo Heza" buri muturage akazagezwaho amakuru yose yifuza kuri Ejo Heza. Akarere ka Nyarugenge kakaba kifuza ko buri muturage yagira ubuzima bwiza n'ubushobozi bwo kwibeshaho atagize uwo abera umutwaro mu zabukuru.