Mu rwego rwo gukomeza gushimangira Imiyoborere myiza ishyira Umuturage ku Isonga hanagamijwe gufasha abaturage kwishimira uburyo bahabwa serivisi, kwakirwa no gukemurirwa ibibazo hirindwa ko basiragira mu nzego zitandukanye z’ubuyobozi, Akarere ka Nyarugenge kashyizeho gahunda yiswe”WIRENGANA HARI UBUYOBOZI”. Umuturage ufite ikibazo kitabashije gukemurirwa mu Isibo ye, Umudugudu cyangwa ku Murenge akizana ku karere hakaba hari Itsinda ry’Abakozi banyuranye n’Abayobozi bamutega amatwi bakagikemura icyo badakemuye bakamukorera ubuvugizi cyangwa bakamwereka izindi nzira yanyuramo ngo gikemuke. Mu mirenge naho bakemura ibibazo bitabashije gukemuka mu nzego zegereye abaturage. Ni gahunda iba buri wa gatatu w’Icyumweru ikabera ku rwego rw’Akarere no ku Murenge. Iyi gahunda ntabwo isimbura izindi zari zihari zo gukemura ibibazo by’abaturage ahubwo irazunganira. Ni ukuvuga ko Inteko z’abaturage ziba buri wa Kabiri w’Icyumweru, Umugoroba w’Umuryango, inama n’izindi gahunda zikemura ibibazo by’abaturage zose zizakomeza gukora.

Mu minsi yashyize hari ubwo wasangaga abaturage batega Abayobozi mu nzira bakunda kunyuramo ngo babagezeho ibibazo byabo bitakemukiye ku rwego babigejejeho mbere, cyangwa bakaba batarishimiye imyanzuro yafashwe ku bibazo bafite. Kuri ibyo byose hakiyongeraho ko wasangaga bahora basiragira mu nzego zose kubera ko batakemuriwe ibibazo. Ibi byabagiragaho ingaruka zo kutabona umwanya wo gukora imirimo ibateza imbere cyangwa ngo bazamure imiryango yabo kuko bahora mu ngendo. Akenshi imiryango yabo nayo byayikururiraga ibibazo by’ubukene bituma abana babo bata ishuri bakaba inzererezi kubera kubura uburere ndetse bikanabaviramo kuba abajura.

Iyi gahunda ishingira kuri gahunda ya Guverinoma y’imyaka 7 (NST1 /2017-2024), mu ngingo ya 99 ijyanye no kugira “Inzego zose za Leta zimakaza imiyoborere igamije kongera umusaruro w’ibyo zikora no kongera ubushobozi bwo gutanga serivisi nziza. Muri uru rwego hanozwa umuco wo guha abaturage serivisi zihuse kandi nziza”. nk’uko kandi biri ngingo ya 5 y’icyerekezo 2050, mu ngingo ishimangira ibijyanye no kugira “Inzego za Leta zishoboye kandi zikora neza ibyo zishinzwe.

UMUSARURO WITEZWE MURI IYI GAHUNDA

Iyi gahunda yitezweho kuzatuma tugira abaturage bishimiye Ubuyobozi kuko bakemuriwe ibibazo none bakaba bafite umwanya wo gukora imirimo ibateza imbere. Kubera ko habaho n’abaturage batishimira imyanzuro ifatwa hashingiwe ku mategeko, hitezwe ko inzego zose zizajya ziba zifite amakuru amwe ku kibazo cy’umuturage