Igikorwa cyo Kwibuka ku nshuro ya 29 Abazize Jenoside yakorewe Abatutsi ku rwego rw'akarere ka Nyarugenge cyabimburiwe no gushyira indabo ku Rwibutso rwa Cyahafi mu murenge wa Gitega ahashyinguwe Abazize Jenoside yakorewe Abatutsi barenga  5000.

Iki gikorwa cyabaye kuri uyu wa 07 Mata 2023 cyitabiriwe na Hon.Kayiranga Rwasa Alfred, Umuyobozi Wungirije w’Umujyi wa Kigali ushinzwe Imibereho myiza n’Iterambere ry’ubukungu Madamu Urujeni Martine, Abagize urwego Nshingwabikorwa rw'Akarere, Inzego z'Umutekano, IBUKA, AVEGA, amadini, imiryango y’Ababuze ababo muri Jenoside yakorewe Abatutsi n'Imbaga y’Abaturage.

Bwana Kabagema Innocent, umwe mu bacitse ku icumu rya Jenoside yakorewe Abatutsi mu murenge wa Gitega yagarutse ku karengane Abatutsi banyuzemo mbere ya Jenoside no muri Jenoside ashimira Ingabo zahoze ari iza RPF Inkotanyi zabarokoye bakongera kuba mu gihugu cyabo badatotezwa

Mu kiganiro yatanze, Hon. Kayiranga Rwasa Alfred yagarutse ku mateka ya Jenoside, Ubumwe bw’Abanyarwanda mbere y’Umwaduko w’Abakoroni, Isenyuka ry’Ubumwe bw’Abanyarwanda, guhagarika Jenoside no kubaka Igihugu. Ati: “Kwibuka ni isoko tuvanamo imbaraga zo kubaka igihugu cyacu”

Umuyobozi Nshingwabikorwa w’Akarere ka Nyarugenge Bwana Ngabonziza Emmy yagarutse ku bibazo byugarije Abacitse ku icumu rya Jenoside yakorewe Abatutsi birimo Ihungabana mu rubyiruko, Intwaza zifite ibikomere mu mitima n'ibindi asaba buri wese kubaba hafi babafata mu mugongo babereka Ibikorwa by’Urukundo bakabahumuriza.

Umuyobozi Wungirije w’Umujyi wa Kigali ushinzwe Imibereho myiza n’Iterambere ry’ubukunguwari wari umushyitsi mukuru muri iki gikorwa yashimiye Inkotanyi zakuye igihugu mu icuraburindi rya Jenoside agaruka kuri gahunda za Leta zifasha Abacitse ku icumu harimo kububakira amacumbi, kubavuza, kubaha ubufasha butandukanye n'ibindi avuga ko bizakomeza Yongeyeho ko ubuyobozi buzakomeza kubaka amazu y’abacitse ku icumu no kuvugurura ashaje. Akangurira Abacitse ku icumu bafite Imishinga mito n’Iciriritse  gukomeza kwegera ubuyobozi kugira ngo imishinga yabo ihabwe inkunga bakomeze kwikura mu bukene