Mu mpera z’icyumweru gishize mu Karere kacu ka Nyarugenge hasojwe amahugurwa y’iminsi 2 yibanze ku gukangurira Abanyamabanga Nshingwabikorwa b’Imirenge n’abashinzwe imibereho y’abaturage mu Mirenge 10 yo mu Karere ka Nyarugenge ibijyanye n’ibibazo abakoresha ibiyobyabwenge bahura nabyo n’uburyo bafashwa kubisohokamo. Ikigamijwe n’ukongera ubufatanye hagati y’inzego z’ibanze, inzego z’ubuvuzi n’izindi mu gufasha abagizweho ingaruka n’ibiyobyabwenge.

Ku bufatanye na Health Development Initiative (HDI), Abanyamabanga Nshingwabikorwa b’Imirenge n’abashinzwe imibereho y’abaturage mu Mirenge bahawe  ubumenyi ku gufasha abagizweho ingaruka n’ibiyobyabwenge binyujijwe mu kumva ibibazo bahura nabyo no gukorana nabo bakabatega amatwi kugira ngo hashakirwe hamwe igisubizo cyatuma basohoka mu ngaruka mbi ziterwa no kunywa ibiyobyabwenge. Hanaganiriwe ku buryo habaho ubufatanye n’imikoranire hagati y’inzego zinyuranye zirimo n’izubuzima mu kwita ku bantu bakoresha ibiyobyabwenge.

Umuyobozi Nshinwabikorwa w’Akarere ka Nyarugenge Bwana Ingangare Alexis yashimiye ibikorwa na HDI mu kwita ku bantu bakoresha ibiyobyabwenge kuko nabo ari abantu nk’abandi asaba ko abakoresha ibiyobwabwenge bakomeza kwitabwaho. Yagize ati: “ Abakoresha ibiyobyabwenge ni abantu nkatwe twese, bityo rero bitaweho bakira bakira bakaba abantu bazima bagakora bakagirira Igihugu akamaro”

Umuhuzabikorwa w’Umushinga wita ku bagizweho ingaruka n’ibiyobyabwenge (TUBITEHO PROJECT) muri HDI Bwana Benimana Elvis yagize ati: “Tuzakomeza gukorana n’inzego z’ubuzima n’izindi nzego mu Karere ka Nyarugenge kugira ngo dukomeze korohereza Abagizweho ingaruka n’ikoreshwa ry’ibiyobyabwenge kugera kuri serivisi z’ubuzima no kubereka ahari ikintu cyose cyabagirira akamaro hagamijwe kubafasha gusohoka mu kibazo barimo”