Kuri uyu wa gatanu mu Rwanda hose hasojwe Ubukangurambaga bw’iminsi 16 bwahariwe ku rwanya ihohoterwa mu Karere ka Nyarugenge iki gikorwa cyabereye mu Murenge wa Kimisagara 

Asoza ubukangurambaga bw'iminsi 16 yo kurwanya ihohoterwa, Umuyobozi Nshingwabikorwa w’Akarere ka Nyarugenge Bwana NGABONZIZA Emmy yasobanuye ingamba akarere kashyizeho mu rwego rwo kurwanya ihohoterwa rishingiye ku gitsina zirimo: 
1. Kwigisha ibyiciro byose by’abaturage, abagabo, abahungu, abakobwa, ababyeyi, abana, urubyiruko n’abaturage muri rusange kurangwa n’imyitwarire myiza izira ihohotera iryo ari ryo ryose,

2. kugira uruhare mu kuryamagana no kudahishira abarikora

3. Kuzamura ubumenyi bw’abaturage ku ihohoterwa rikorerwa mu ngo no kwigisha abaturage amategeko ahari ahana ihohoterwa rishingiye ku gitsina

Yanagarutse ku nama n’ibiganiro byinshi byakozwe bihuza abaturage, amatsinda atandukanye, amakoperative yihariye ahuza abagabo, urubyiruko rw’abahungu n’abakobwa, ababyeyi, abana hagamijwe kubakangurira kwirinda ihohoterwa.
Yanavuze ko akarere kashyzeho uburyo bwo kumenyekanisha inzira uwahohotewe anyuramo kugira ngo ahabwe ubutabera, anagaruka ku gikorwa cyo gushyiraho ahantu hizewe hiswe urubohero ku bakobwa hagamijwe kubaha inyigisho zibarinda ababashora mu ngeso mbi z’ubusambanyi no kunywa ibiyobyabwenge. 
Yanasobanuye ibikorwa byo gufasha abahohotewe bahabwa ubuvuzi bukwiye ndetse n’ibiganiro bibagarurira icyizere cyo kubaho
Muri iki gikorwa kandi Umuyobozi Nshingwabikorwa w’Akarere ka Nyarugenge yasezeranyije imiryango 65 yabanaga mu buryo butemewe n’amategeko. 
Umwe mu basezeranye yagize ati: “Najyaga ngorwa no kuvuza abana banjye kandi umugabo ari mu bwishingizi ariko ubwo dusezeranye bizatuma abana bavuzwa bityo bagire ubuzima bwiza”
Yashoje agira ati “Iyi minsi 16 ni ikimenyetso kitwereka ibyo tugomba gukora mu gukomeza gukumira no kurwanya ihohoterwa rishingiye ku gitsina” 
Tubibutse ko iyi gahunda yo kurwanya ihohoterwa rishingiye ku gitsina iba buri mwaka kuva ku italiki 25 Ugushyingo, kumunsi mpuza mahanga wo kurwanya ihohoterwa rikorerwa abagore n’bakobwa, kugeza ku itariki ya 10 Ukuboza ku munsi wahariwe kuzirikana Itangazo Mpuzamahanga ryerekeye Uburenganzira bwa Muntu, aho abantu bashishikarizwa ‘kugabanya ubusumbane no guteza imbere uburenganzira bwa muntu. U Rwanda rwifatanya n’Isi yose gukora ubukangurambaga bumara iminsi 16 yahariwe kurwanya ihohoterwa rishingiye ku  gitsina. Insanganyamatsiko y’uyu mwaka yagiraga iti:Wiceceka! Rwanya ihohoterwa rishingiye ku gitsina.