Abanyeshuri bose mu gihugu bazasubukura amasomo yabo tariki 26 Nzeri 2022. Kimwe n’ahandi hose mu gihugu, Abanyeshuri batandukanye mu karere ka Nyarugenge bari bamaze iminsi muri gahunda yiswe “Intore mu biruhuko” ariyo gahunda yo gufasha urubyiruko kwidagarura, kubarinda ingeso mbi no kubura icyo bakora, ahubwo bagatozwa imikino, umuco n'ibindi bitandukanye. 

Mu kigo cy'Urubyiruko cya Kimisagara habereye igikorwa cyo gusoza ibiruhuko ku banyeshuri bagiye gusubira mu mashuri. Ni igikorwa cyitabiriwe n'Umuyobozi w’Umujyi wa Kigali Bwana Rubingisa Pudence, umuyobozi w’Umujyi wa Kigali Wungirije Ushinzwe imibereho myiza y’abaturage n’ubukungu Madamu Urujeni Martine, Umuyobzi Nshingwabikorwa w’Akarere ka Nyarugenge Bwana Ngabonziza Emmy, abagize inzego z'umutekano n'abandi bashyitsi

Muri icyo gikorwa, Umujyi wa Kigali wageneye ibikoresho bya siporo Ibigo by'Urubyiruko byo mu Turere tw'Umujyi wa Kigali mu gukomeza guteza imbere imikino no gushishikariza abana n'urubyiruko gukunda siporo. Mu ijambo rye, Umuyobozi w’Umujyi wa Kigali yavuze ko iyi gahunda y'intore mu biruhuko yitabiriwe n'urubyiruko rw'abanyeshuri basaga 50,000 ashima ko yatanze umusaruro yari yitezweho nko gukumira ubuzererezi mu bana bari mu biruhuko, gukuza impano abana bifitemo n'ibindi.

Umuyobozi Nshingwabikorwa w’Akarere ka Nyarugenge nawe yashimiye ibyiciro binyuranye byagize uruhare kugira ngo gahunda y'Intore mu biruhuko itange umusaruro, anashimira ababyeyi bitabiriye kohereza abana bagatozwa indangagaciro z'umuco Nyarwanda, bagakuza impano zabo kandi bikabarinda ubuzererezi