Mu karere ka Nyarugenge kuri uyu wa 9 Gashyantare 2024 hatangijwe gahunda yo guteza imbere imirire myiza mu ngimbi n'abangavu (STRONG) hagamijwe gutegura ababyeyi beza b'ejo hazaza, guca burundu imirire mibi no gukumira igwingira hakiri kare.

Iyi gahunda irakorwa ku bufatanye n’Ikigo cy’Igihugu gishinzwe imikurire no kurengera umwana (NCDA) ndetse na Catholic Relief Services (CRS).

Iki gikorwa cyitabiriwe n'Umuyobozi Mukuru Wungirije wa NCDA Bwana Munyemana Gilbert, Umuyobozi wa Catholic Relief Services mu Rwanda Fly Hans ndetse n’Umuyobozi Nshingwabikorwa Wungirije w’Akarere ka Nyarugenge Madamu Nshutiraguma Esperance n'abandi. Bakurikiranye igikorwa cyo gupima abangavu ingano y'amaraso, banatera ibiti by'imbuto ku kigo cy’amashuri cya EPA hano muri Nyarugenge.

Mu butumwa yatanze, Umuyobozi Mukuru Wungirije wa NCDA Bwana Munyemana Gilbert yasabye abana n'ababyeyi kwita ku mirire y'abangavu n'ingimbi, yibutsa abayobozi b'amashuri gukora ibishoboka byose abana bakajya babona ifunguro ririmo intungamubiri zose ku ishuri. Yasoje asaba ko mu ishyirwa mu bikorwa ry'uyu mushinga abana n'ababyeyi bazigishwa ikibazo cy'indwara y'ibura ry'amaraso (anemia) kuko bigaragara ko ari ikibazo mu bangavu.