Mu rwego rwo kwizihiza Umunsi mpuzamahanga, uyu munsi Tariki ya 20 Ugushyingo 2025, Umuyobozi Nshingwabikorwa Wungirije Madamu Uwamahoro Genevieve yifatanyije yifatanyije n'abanyeshuri 2,447 biga ku Ishuri rya EP Intwari mu Murenge wa Rwezamenyo mu kwizihiza Umunsi mpuzamahanga w'abana ku nsanganyamatsiko igira iti: “Uburenganzira bwanjye, igihe cyose” 

Madamu Uwamahoro Genevieve yagize ati: “Abana nimwe musingi wo kubaka u Rwanda rw'ejo, nimwe duhanze amaso kuko nimwe muzaba abayobozi b'ejo hazaza nimwe muzusa ikivi ababyeyi banyu bateruye. Niyo mpamvu isi yose yifatanya namwe mu kwizihiza uyu munsi, hazirikanwa uburenganzira bwanyu ndetse n'inshingano zanyu mu kugira uburere buboneye”

UBURENGANZIRA BW'UMWANA

Uburenganzira bw'umwana bushingiye ku mahame yo kutavangurwa, guharanira inyungu z'umwana mu kintu cyose cyamugirira akamaro mu rwego rw'imibereho myiza, ubuzima, uburezi, umutekano n'ibindi.

Umwana  agomba kugira ibimuranga, akarindwa  ihohoterwa iryariryo  ryose  ryaba:

• Irishingiye ku kubabaza umubiri

• Gushengura umutima

• Kutitabwaho uko bikwiye

• Kuvutswa  amahirwe

• Irishingiye  ku gitsina

• Ivangura, n'ibindi.

Umwana agomba kandi kugira ubwisanzure mu mitekerereze, mu kugaragaza ibitekerezo bye no guhabwa   ijambo, kugira  umutimanama no   guhitamo   idini yishakiye; agomba  kandi  kugira ubwisanzure busesuye mu kwidagadura no gukina,agahabwa n'ubutabera

IBYAHA BIKORERWA ABANA

Ibyaha bikorerwa abana ni byinshi kandi amategeko yateganyirije ibihano ababikora. Bimwe muri ibyo byaha ni ibikurikira:

• Gusambanya umwana

• Kumukubita cyangwa kumukomeretsa ku bushake

• Kumuhoza ku nkeke cyangwa kumuha ibihano biremereye

• Guha umwana inzoga cyangwa itabi cyangwa kubimugurisha

• Kwirengagiza inshingano z'umubyeyi cyangwa umwingishingizi nta mpamvu

• Kwambura umwana ababyeyi be, abishingizi be cyangwa abo asanzwe abana na bo

•  Guta cyangwa gutererana umwana

• Gushora umwana mu busabirizi

• Kwereka umwana amashusho yerekeranye n'ishimishamubiri rishingiye ku gitsina cyangwa kumwumvisha amajwi yaryo

• Gukoresha umwana imirimo ivunanye itajyanye n'ikigero cye cyangwa ibujijwe ku mwana

LNSHINGANO Z'UMWANA

Abana barasabwa gukunda ababyeyi babo, kubizera kubagisha inama kuko umubyeyi ariwe wa mbere wo kwizerwa wakagombye kubitsa ibanga. 

Buri mwana kandi afite inshingano agomba kuzuza mu muryango we, mu muryango mugari, mu gihugu cye, imiryango yemewe n'amategeko no mu muryango mpuzamahanga.

Umwana, hakurikijwe imyaka ye n'ubushobozi bwe, afite inshingano zo: 

• Gufasha ababyeyi imirimo igihe ari ngombwa,

• Guharanira amahoro, ituze n'ubumwe by'umuryango, 

• Gubaha ababyeyi be, abamukuriye n'abayobozi igihe cyose 

• Gukorera igihugu cye agiha imbaraga n’ubwenge bye