Mu Karere kacu ka Nyarugenge kimwe n’ahandi hose mu Gihugu kuri uyu wa 25 Ukwakira 2024 hatangijwe ibikorwa by’Ukwezi k’Ubumwe n’Ubudaheranwa hazirikanwa ko Ubumwe bw’Abanyarwanda ari ubuzima bwa buri munsi bw’Igihugu.

Buri mwaka ukwezi k’Ukwakira ni ukwezi kwahariwe ibikorwa byahariwe Ubumwe n’Ubudaheranwa nk’isoko-muzi Abanyarwanda basangiye. Muri uyu mwaka insanganyamatsiko y’ukwezi k’ubumwe n’ubudaheranwa igira iti: ‘‘Indangagaciro na Kirazira, isoko y’ubumwe n’ubudaheranwa by’Abanyarwanda’’

 Iyi nama ihuza ibyiciro binyuranye by’Abayobozi bariho muri iki gihe n’abahoze aribo ifite uruhare ntagereranywa mu kwimakaza ‘Ndi Umunyarwanda’ Ibi biganiro bigamije gusuzuma intambwe imaze guterwa mu rugendo rw’Ubumwe n’Ubudaheranwa, inzitizi zikigaragara n’ingamba zo kuzikemura;

Agaruka kuri iki gikorwa Umuyobozi Nshingwabikorwa w’Akarere ka Nyarugenge Bwana Ingangare Alexis yagarutse ku bufatanye bw’Akarere n’Abafatanyabikorwa ndetse n’abaturage avuga ko hakozwe ibikorwa binyuranye birimo:

• Ibiganiro byatanzwe by’Isanamitima na Ndi Umunyarwanda mu byiciro binyuranye birimo, abaturage, abanyeshuri mu bigo by’amashuri, urubyiruko, n’abakangurambaga b’Ubumwe n’Ubudaheranwa
• Habayeho gukurikirana no gusubiza mu buzima busanzwe abarangije igihano bakatiwe n’Inkiko Gacaca kubera uruhare bagize muri Jenoside yakorewe Abatutsi

• Hakozwe gahunda y’imbabazi graduation ku bufatanye na ADEPER
• Hakurikiranywe hanayoborwa ibiganiro mpaka mu mashuri akorera hirya no hino mu Karere
• Hahuguwe Abarinzi b’Igihango ku rwego rw’Akarere bakaba baritabiriye amahugurwa yabeye I Nkumba mu Karere ka Burera ndetse n’ayabereye ku rwego rw’Akarere,
• Hahuguwe abakangurambaga b’Ubumwe n’Ubwiyunge, abagize amashyirahamwe y’Ubumwe n’Ubwiyunge, n’abagize club z’ubumwe n’ubwiyunge mu bigo by’amashuri
• Hakurikiranwe ihame ry’Ubumwe n’Ubudaheranwa mu gihe cyo kwibuka abazize Jenoside yakorewe abatutsi 1994, muri iyi gahunda hakaba hashimirwa by’umwihariko PSF yasuye kandi igafasha intwaza zatujwe Nyarurenzi mu murenge wa Mageragere
• Hakurikiranwe kandi ibikorwa by’abafatanyabikorwa b’Ubumwe n’Ubudaheranwa hanakorwa inama z’ibahuza n’Akarere

IMBOGAMIZI ZIKIGARAGARA

• Ababyeyi bamwe badasobanurira aabana babo amateka y’ukuri bigatuma bishakashakiriza
• Abakoresha imbuga nkoranyambaga mu gusenya ubumwe bw’Abanyarwanda
• Imiryango ibana mu makimbirane
• Ubwitabire buke mu matsinda y’ibiganiro by’Ubumwe n’Ubudaheranwa kubera imibereho y’ubuzima bw’Umujyi aho babeshwaho no gushakisha

IBITEGANYIJWE

• Ibikorwa by’Ubumwe n’Ubudaherwanwa, gukangurira abaturage guhindura imyumvire, gufasha abahuye n’ibibazo, gukomeza ubufatanye n’abafatanyabikorwa b’Ubumwe n’Ubudaheranwa no gukangurira urubyiruko kurangwa n’umuco Nyarwanda no gukomera kuri Ndi Umunyarwanda