Muri gahunda y’ubukangurambaga bwo kurwanya ruswa n’akarengane, none tariki ya 7 Gicurasi 2022 mu kigo cy’Urubyiruko cya Kimisagara umuyobozi Nshingwabikorwa w’Akarere ka Nyarugenge Bwana Ngabonziza Emmy hamwe n’inzego z’umutekano bagiranye ibiganiro n’abagize Inama ngishwanama ku kurwanya ruswa n’akarengane mu mirenge ya  Kimisagara, Muhima, Gitega na Nyarugenge. Ibi biganiro bikaba byitabiriwe kandi n’Intumwa y’Urwego rw’Umuvunyi Madamu Nyirakanyana Christine, abagize Inama y’Igihugu y’Urubyiruko n’iyabagore mu karere ka Nyarugenge n’abikorera (PSF).

Atangiza iyi nama, Umuyobozi Nshingwabikorwa w’Akarere ka Nyarugenge, Bwana Ngabonziza Emmy yabwiye abagize iriya nama ngishwanama yo kurwanya ruswa n'Akarengane muri iyo mirenge ko bibabaje kubona umuyobozi cyangwa umukozi runaka icyo yaba ashinzwe cyose aho gukorera neza abaturage ashinzwe ahubwo akabashyiraho akarengane no kubaka ruswa ati: "twange ruswa"

Atanga ikiganiro ku ruhare rw'ubuyobozi mu kurwanya ruswa n'akarengane, Madamu Nyirakanyana Christine wari uhagarariye Urwego rw’Umuvunyi yagarutse ku bubi bwa ruswa agaragaza ko:

• Ruswa ituma gahunda za Leta zitagerwaho
• Ruswa itesha ubuyobozi icyubahiro
• Ruswa ibangamira umutekano rusange w’abantu
• Ruswa isenya ubupfura n’imico myiza n’ibindi

Abitabiriye bahawe ibiganiro bikurikira :

1. Uruhare rw'ubuyobozi mu kurwanya Ruswa n'akarengane

2. Uruhare rw'abayobozi b'inzego z'ibanze mu kubungabunga umutekano

3. Uruhare rw'inzego z'ibanze mu kwihutisha imihigo

Iyi gahunda izakomereza mu mirenge ya Nyamirambo, Rwezamenyo na Nyakabanda bazahurira muri St Andre tariki ya 10/05/2022