Kuva tariki ya 01 kugeza tariki 31 Ukwakira 2023, mu karere ka Nyarugenge kimwe n’ahandi mu gihugu barazirikana ukwezi kwahariwe kuzirikana ubumwe n’ubudaheranwa bw’abanyarwanda. Mu karere ka Nyarugenge iki gikorwa cyatangirijwe mu Murenge wa Kanyinya uyu munsi tariki 02 Ukwakira 2023 cyitabirwa n’Abayobozi banyuranye barimo Umuyobozi w’Umujyi wa Kigali wungirije Ushinzwe Ubukungu n’Imibereho myiza y’Abaturage, Madamu Urujeni Martine, Umuyobozi Nshingwabikorwa w’akarere ka Nyarugenge Bwana Ngabonziza Emmy, Intumwa ya MINUBUMWE, Ubuyobozi bw’Umurenge, Inzego z’Umutekano n’Imbaga y’abaturage.

Madamu Urujeni Martine yasabye abaturage gusasa inzobe no gusuzuma inzitizi zibangamiye ubumwe n’Ubudaheranwa bw’Abanyarwanda aho batuye aho bakorera ndetse n’aho basengera, yagize ati: “icyo dupfana kiruta icyo dupfa”

Yongeyeho ati: “Turandure kwironda n’ibindi byose bishingiye ku ivangura, ku moko aho abantu bavuka aho baturuka n’utundi dutsiko uko tungana kose tudashingiye ku bumwe bwacu bishobora kutwangiriza”

Yongeye kubibutsa gutanga amakuru ahari imibiri yabazize Genocide yakorewe Abatutsi nabo bagashyingurwa. Yasabye abagize uruhare muri Genocide barangije ibihano  n’abo basanze ku misozi kubana neza nk’Abanyarwanda.

Umuyobozi Nshingwabikorwa w’Akarere ka Nyarugenge Bwana Ngabonziza Emmy yashimiye Abaturage ba Kanyinya ku ntambwe bamaze gutera yo gusigasira ubumwe n’Ubudaheranwa bw’Abanyarwanda. Asaba buri wese gusigasira Ubumwe bw’abanyarwanda no kwirinda icyabuhungabanya, yibutsa ko tariki 01/10/1990 aribwo RPA/RPF batangije urugamba rwo kubohora Igihugu hagamijwe kurengera Inyungu z’Abanyarwanda bose.

Zimwe mu nzitizi zikibangamiye ubumwe bw’abanyarwanda nk’uko zagaragajwe n’Intumwa MINUBUMWE:

• Kwironda bishingiye ku moko, aho abantu baturuka cyangwa bavuka no ku tundi dutsiko utwo aritwo twose turangwa n’ivangura;
• Guhisha nkana no kwinangira gutanga amakuru y’ahakiri imibiri y’abazize Jenoside yakorewe Abatutsi itarashyingurwa mu cyubahiro;
• Ibibazo by’ihungabana rikomoka kuri Jenoside yakorewe Abatutsi bigira ingaruka ku mibanire y’imiryango n’imyitwarire mu rubyiruko;
• Ikwirakwizwa ry’imvugo zibiba urwango n’ingengabitekerezo ya Jenoside mu karere u Rwanda ruherereyemo no mu mahanga
• Kugoreka ukuri kw’amateka yaranze u Rwanda n’ayaranze Jenoside yakorewe Abatutsi muri rusange

Intego z’Ukwezi kwahariwe Ubumwe n’Ubudaheranwa:

• Gusuzuma ibyagezweho no kwishimira intambwe imaze guterwa mu Bumwe n’Ubudaheranwa bw’Abanyarwanda;
• Gusesengura ibikibangamiye Ubumwe bw’Abanyarwanda muri iki gihe no gufata ingamba zo kubikemura;
• Kongera imbaraga mu biganiro bya Ndi Umunyarwanda mu nzego zose no mu byiciro byose by’Abanyarwanda, aho abaganira bibanda ku bibazo byihariye bigaragara aho batuye, aho bakorera n’ahandi;
• Kwibutsa Abanyarwanda, abato n’abakuru, ko gusigasira no guteza imbere ubumwe n’ubudaheranwa ari inshingano ya buri wese.