Ku bufatanye na DUHAMIC ADRI mu murenge wa Kimisagara kuri uyu wa 25 Kanama 2023 hakozwe ubukangurambaga ku kurwanya ibiyobyabwenge n’inda ziterwa abangavu. Ni igikorwa cyitabiriwe n’Umunyamabanga Uhoraho muri Minisiteri y'Urubyiruko, Ubuyobozi bw’Akarere n’umurenge, Abagize Inzego z’umutekano n’imbaga y’Urubyiruko. Ubu bukangurambaga bufite insanganyamatsiko igira iti:"Rubyiruko ejo hazaza hari mu biganza byawe irinde ibiyobyabwenge n'inda zitateguwe ugere ku nzozi zawe."

Mu Ijambo rye, Bwana Busabizwa Parfait, Umunyamabanga Uhoraho muri Minisiteri y'Urubyiruko yakanguriye urubyiruko kwirinda ibiyobyabwenge, inda zitateguwe n'inzoga nyinshi kuko bibangiriza ejo hazaza heza. Yaboneyeho kubasaba kubyaza umusaruro amahirwe Igihugu giha urubyiruko harimo n'ibikorwaremezo bya siporo.

Ubu bukangurambaga bufasha urubyiruko kumenya ibibi byo kunywa ibiyobyabwenge, kwirinda imyitwarire mibi iganisha ku nda ziterwa abangavu bikabaviramo imibereho mibi no gucikiriza amashuri. Hitezwe ko urubyiruko ruzahindura imyumvire maze rukagira ubuzima bufite intego.