Umuyobozi Nshingwabikorwa w’Akarere ka Nyarugenge Bwana Ingangare Alexis kuri uyu wa 18 Nzeri 2024 yifatanyije n’abagize Inzego z’Umutekano n’imbaga y’abaturage mu gikorwa cyo gutangiza Igihembwe cy’Ihinga 2025A mu gishanga cya Nyarufunzo gikora ku mirenge 3 ariyo Mageragere, Nyamirambo na Kigali. Yabasabye gushyira mu bwishingizi ubuhinzi bwabo kugira ngo birinde ibihombo bishobora guterwa no kurumbya.  

Abaturage bibumbiye muri Koperative Urumuri bagera kuri 275, Abagize Koperative KOKOGU ihinga mu gishanga cya Nyarufunzo ahegereye Umurenge wa Kigali bagera kuri 38, abagize amatsinda ahinga mu gishanga cya Nyarufunzo ku ruhande rwegereye Nyamirambo barenga 80 bahuriye mu gishanga cya Nyarufunzo ari naho hatangirijwe ku mugaragaro igihembwe cy’Ihinga 2025A. Mu bikorwa bakoze harimo gukoresha ifumbire ya DAP na Urea ndetse no gushyiramo ifumbire y’imborera tutibagiwe no gutera imbuto y’Ibigori y’indobanure.