Mu midugudu 350 igize Akarere kacu ka Nyarugenge ejo hashize tariki ya 17 Kanama 2025 habaye Umugoroba w’Imiryango aho abaturage bicaye hamwe maze biga ku bibazo byugarije umuryango mu midugudu yabo birimo kubonera umuti amakimbirane mu miryango, uburere bw’abana, kwita ku isuku no gukangurira imiryango kwishyura ubwisungane mu kwivuza n’ibindi bibazo bigaragara mu miryango.  

Minisiteri y’Uburinganire n’Iterambere ry’Umuryango (MIGEPROF) isobanura ko Umugoroba w'Imiryango ari Urubuga abagize imiryango batuye mu mudugudu bahuriramo kugira ngo bungurane ibitekerezo ku ngamba zafatwa kugira ngo barusheho kwiteza imbere no kunoza imibanire yabo, bakumira kandi bakemura amakimbirane ashobora kuvuka mu ngo, mu baturanyi cyangwa ahandi aho ariho hose.

Intego z'Umugoroba w'Imiryango:

• Intego rusange y'Umugoroba w'Imiryango ni ukugira umuryango ushoboye, wihagije mu bukungu kandi utekanye, aho abawugize buzuzanya muri byose kandi bakubahana hagati yabo.

Intego zihariye z'Umugoroba w'Imiryango ni izi zikurikira:

• Guteza imbere imibanire n'imibereho myiza y'abagize imiryango mu Mudugudu;
• Gutegura abagiye gushinga urugo
• Gukumira ibyaha mu miryango;
• Gukumira no gukemura amakimbirane mu miryango igize Umudugudu;
• Guteza imbere uburere, uburezi n'uburenganzira bw'abana n' ubw'abagize umuryango bose;
• Kwimakaza ihame ry'uburinganire n'ubwuzuzanye mu muryango;
• Guteza imbere ubukungu mu miryango hagamijwe imibereho myiza y'abayigize kandi babigizemo uruhare;
• Gutoza abagize umuryango kwitabira gahunda zose za Leta.