Umuyobozi w’Umujyi wa Kigali Wungirije ushinzwe Ubukungu n’Imibereho y’Abaturage, Madamu Urujeni Martine, Umuyobozi Nshingwabikorwa w’Akarere ka Nyarugenge Bwana Ingangare Alexis n'abandi bayobozi mu nzego zinyuranye tariki 15 Ukwakira 2025 bitabiriye Igikorwa cyo kwakira  ibitekerezo by'abaturage mu igenamigambi rya 2026-2027 no kugaragaza uko ibyo baduhaye mu myaka ishize byashyizwe mu bikorwa.

Iki gikorwa cyabereye mu Murenge wa Muhima ndetse n’ahandi hose mu Mirenge igize Akarere ka Nyarugenge mu Nteko z’Abaturage. 

Bimwe mu bikorwa twagaragarijwe mu myaka yatambutse byashyizwe mu Igenamigambi mu Murenge wa Muhima bigakorwa birimo: 

• Ruhurura ya Kabasengerezi yubatswe
• Umuhanda uva ku Bitaro bya Muhima ugera kwa Mutangana warubatswe
• Umuhanda Gitega - Muhima na wo warubatswe
• Igishanga Nyabugogo - Kinamba cyatangiye gutunganywa
• Ikigo Nderabuzima cya Muhima cyatangiye kuvugururwa, n’ibindi

Mu bikorwa bindi biteganyijwe muri uyu Murenge harimo: 

• Kwagura imihanda Yamaha - Kinamba na Kinamba - Poids Lourds ikagira ibice bine
• Kuvugurura Gare ya Nyabugogo ikajyanishwa n’igihe
• Gukomeza no kurangiza kubaka umushinga w’Isoko rya Nyabugogo, n’ibindi