Umuyobozi Nshingwabikorwa w’Akarere ka Nyarugenge, Bwana Ingangare Alexis kuri uyu wa 13 Kanama 2025 yifatanyije n'urubyiruko n'abaturage b’Umurenge wa Nyamirambo muri gahunda yo kwizihiza Umunsi Mpuzamahanga w’Urubyiruko ufite insanganyamatsiko igira iti: “Kubaka ubushobozi bw’Urubyiruko hagamijwe Iterambere Rirambye”
Mu Ijambo rye, Bwana Ingangare Alexis, Umuyobozi Nshingwabikorwa w’Akarere ka Nyarugenge yashimiye Ubuyobozi bukuru bw'igihugu ku bwo kuzirikana urubyiruko muri gahunda zinyuranye z'iterambere anagaruka ku ngingo zinyuranye zirimo:
• Gushimira urubyiruko ku ruhare bagira mu gukemura ibibazo bibangamiye imibereho myiza y'abaturage nko gufasha abaturage kubaka imirima y’Igikoni, gufasha mu gikorwa cyo gukura abana b’inzererezi mu mihanda, kwigisha abaturage ibijyanye n’isuku n’isukura n’ibindi
• Yasabye urubyiruko kwitwara neza birinda ibiyobyabwenge n'ingeso mbi zirimo ubusinzi, ubuzererezi, ubusambanyi n’izindi. 
• Yasabye urubyiruko gukomeza kwitabira gahunda zo kwihangira imirimo n'ibikorwa bitanga akazi, kuvana amaboko mu mifuka bagakora hagamijwe kwikura mu bukene
• Yibukije urubyiruko gukomeza kurinda ibyagezweho
• Yabakanguriye kwitabira ibikorwa by'icyumweru cy'urubyiruko n'ibikorwa by'intore mu biruhuko
• Yabibukije gukomeza umuco wo gukorera ku mihigo n’ibindi. 
Iki gikorwa cyaranzwe n'ibikorwa bitandukanye byateguwe n'urubyiruko birimo kumurika ibikorwa by'urubyiruko, kwerekana impano urubyiruko rwifitemo zirimo imbyino gakondo n'izigezweho, imideri, ikinamico, imivugo n'ibindi