Mu bufatanye isanzwe ifitanye n’Akarere ka Nyarugenge, kuri uyu wa 24/11/2022 COGEBANQUE PLC yishyuriye ubwishingizi bwo kwivuza abaturage 500, bafite amikoro make kurusha abandi. Ibi biri mu ntego banki y’ubucuruzi Cogebanque yihaye yo gufasha abaturage ari na bo bafatanyabikorwa bayo b’imena izatuma babona serivisi z’ubuvuzi mu buryo bworoshye, binyuze mu kugabanya igiciro cyazo.

Umuyobozi w’Imirimo rusange mu Karere ka Nyarugenge, Madamu Murebwayire Betty yashimiye COGEBANQUE kuri iki gikorwa cyo gufasha abaturage b’amikoro make kubona serivisi z’ubuvuzi ku buryo bworoshye yongeraho ko mu guhitamo abahabwa iyi nkunga, bagendera ku makuru bahabwa n’inzego z’ibanze cyane ko baba bazwi hagendewe ku byiciro by’ubudehe.

Umuyobozi muri COGEBANQUE ushinzwe imenyekanishabikorwa, Antoine Iyamuremye yishimiye ko abahawe ubufasha ari nabo bafatanyabikorwa  mu guteza imbere ubukungu bw’Igihugu. Ati "Hari abaturage baba bafite amikoro make ku buryo kubona amafaranga yo kwishyura biba bigoye. Iyo tubonye nk’aba bafatanyabikorwa badufasha kubabonera uko bivuza. Ni umusanzu ukomeye cyane."