Ku bufatanye bw'Akarere ka Nyarugenge, Komisiyo y'ubutabera n'amahoro (CDJP Kigali) kuri uyu wa 27 Kanama 2027 hateguwe inama yo kuganira ku bikorwa by’Ubumwe, ubudaheranwa n’isanamitima. 

Atangiza iyi nama, Madamu Uwamahoro Genevieve Umuyobozi Nshingwabikorwa Wungirije w’Akarere ka Nyarugenge yibukije ko iyi nama itegurwa hagendewe ku cyifuzo cyo komora Abanyarwanda ibikomere bikomoka ku mateka mabi Igihugu cyanyuzemo. Asaba abafatanyabikorwa b’Akarere muri iyi gahunda gukomeza gukorana umurava no kugera kuri buri wese iyi gahunda yagirira akamaro.

Padiri Donatien Twizeyumuremyi, Umuyobozi wa Komisiyo y’Ubutabera n’amahoro muri Arikidiyosezi ya Kigali nawe yasabye inzego bakorana zose gukomeza gushyira hamwe kugira ngo barusheho kunoza akazi bakora maze bashobore no kugera ku Banyarwanda bakeneye ubufasha mu bijyanye n’Ubumwe, ubudaheranwa n’isanamitima. 

Tubibutse ko uyu mushinga w’Ubumwe n’Ubudaheranwa ukorera mu turere twa Gakenke, Rulindo na Nyarugenge ku bufatanye n’utwo turere Minisiteri y’Ubumwe n’Inshingano Mboneragihugu(MINUBUMWE) ndetse na Arikidiyosezi ya Kigali. 

Iyi nama yitabirwa n’abafatanyabikorwa banyuranye barimo:

• Umuyobozi w'Akarere wungirije ushinzwe iterambere ry'imibereho myiza y'abaturage
• Umuyobozi w'Ishami ry'imiyoborere mu Karere
• Umutahira w’Intore mu Karere
• Umukozi uhuza ibikorwa by'abafatanyabikorwa (JADF)
• Umukozi w’Inzu ifasha abaturage kugera ku butabera (MAJ)
•  Abafatanyabikorwa bakorera mu Karere ka Nyarugenge bakora ku bijyanye n'isanamitima n'imibanire myiza
• Abahagarariye abarinzi b'igihango
• Abahagarariye amatsinda y'ubumwe n'ubudaheranwa
• Abahagarariye amadini afite ibikorwa by'isanamitima,