Kuri uyu munsi tariki 28 Ugushyingo 2025 Umuyobozi Nshingwabikorwa w’Akarere ka Nyarugenge Wungirije, Madamu Uwamahoro Genevieve yagiranye Inama n’Inzego zinyuranye maze bagaruka ku gukemira ibibazo bibangamiye imibereho myiza y’abaturage, imicungire y’Ibiza, kwirinda Inzoga zitujuje ubuziranenge, ubugenzuzi bw’utubari, Imikorere y'Irondo ry'Umwuga no kwitegura iminsi mikuru isoza umwaka

IMICUNGIRE Y’IBIZA

Umuyobozi w'Akarere ka Nyarugenge Wungirije yabwiye abari mu nama ko muri  iki gihe cy'imvura y'umuhindo, Imirenge yakomeza kureba ahantu hashyira ubuzima bw'abahatuye mu kaga, kugirango bakomeze gushakirwa uburyo bakimurwa ndetse no gukomeza gukora ubukangurambaga mu nama z'abaturage bashishikarizwa gukomeza gusibura inzira z'amazi zasibye. 

INZOGA ZITUJUJE UBUZIRANENGE

Inama yagarutse ku kibazo cy'inzoga zitujuje ubuziranenge ziteza umutekano muke mu baturage imirenge yongera gusabwa gufatanya mu ikorwa rya raporo y'urutonde rw'Abenga bakanacuruza inzoga zitujuje ubuziranenge ruvuguruye igatangwa bitarenze tariki ya 01 Ukuboza 2025.

Inama yasabye Inzego z'Ibanze niz'Umutekano ku rwego rw'Akagari gutegura target operations zo gufata no kumena inzoga zitujuje ubuziranenge bigakorwa buri cyumweru.

UBUGENZUZI BW'UTUBARI

Inama yasabye abitabiriye kongera imbaraga mu bugenzuzi bw'Utubari kuko bigaragara ko bwagabanutse kandi kudakorwa uko bikwiye biri mu bituma ibyaha bikomeza kwiyongera.

IBIBAZO BIBANGAMIYE IMIBEREHO MYIZA Y’ABATURAGE

Inama yasabye Inzego bireba gukomeza kugaragaza abagomba gusanirwa amazu bafite irangamuntu zidahuye na UPI y'ibibanza amazu basabira gusanirwa yubatsemo bigakosorwa maze bagafashwa.

UMUGANDA RUSANGE USOZA UKWEZI

Inama yasabye abitabiriye gushyiraho Command post y'Umuganda izagenzura Sites zashyizweho zizakorerwaho umuganda no gukora ubukangurambaga mu gushishikariza abaturage kuzitabira umuganda ku bwinshi.

IMIKORERE Y'IRONDO RY'UMWUGA

Inama yamenyesheje imirenge ko hari gahunda yateganyijwe yo gusura irondo ry'Umwuga izakorwa n'abagize Komite y'Umutekano itaguye y'Akarere ka Nyarugenge basabwa gutegura ingengabihe yuko bazasurwa.

KWITEGURA IMINSI MIKURU ISOZA UMWAKA

Inama yasabye imirenge gukora ubukangurambaga mu gushishikariza abaturage kurimbisha Umujyi cyane cyane bibanda ku bacuruzi n'abafite inyubako nini mu gice cy'Umujyi.