Mu karere ka Nyarugenge hasojwe imurikabikorwa by’abafatanyabikorwa mu iterambere ry’Akarere (JADF) kuri uyu wa 29 Werurwe 2024. Ni imurikabikorwa ryari rimaze iminsi 3 ribera ahazwi nko mu Imbuga City Walk (Car Free Zone) rikaba ryaratangiye tariki 27 Werurwe 2029 ku nsanganyamatsiko igira iti: ‘Umuturage ku Isonga: Serivisi uhabwa ni uburenganzira bwawe’.

Umuyobozi w’Umujyi wa Kigali Bwana Dusengiyumva Samuel yavuze ko iri murikabikorwa rigamije kugaragariza abatuye Umujyi wa Kigali by’umwihariko Akarere ka Nyarugenge serivisi n’ibikorwa bitandukanye by’inzego za Leta, imiryango itari iya Leta, ibigo by’imari n’iby’ubucuruzi, ibigo by’ubwishingizi, Amakoperative n’abandi. Yashimiye abafatanyabikorwa uruhare bagira mu gushyigikira gahunda za Leta zitandukanye zigamije iterambere n’imibereho myiza y’abatuye Umujyi wa Kigali.

Bwana Harushyabana Bernard Umuyobozi Wungirije wa JADF Nyarugenge akaba n’Umuyobozi muri DUHAMIC ADRI (Chief of Party) yavuze ko bazakomeza gufatanya n’akarere ka Nyarugenge hagamijwe gutuma abaturage bagira imibereho myiza kuko bose bakorera abaturage.

Umuyobozi Nshingwabikorwa w’Akarere ka Nyarugenge Bwana Ngabonziza Emmy yashimiye abafatanyabikorwa b’Akarere ku bikorwa bizamura imibereho y’abaturage bafatanyamo n’Akarere abasaba kudatezuka ku Iterambere ry’abaturage.

Abafatanyabikorwa mu Iterambere ry’Akarere ka Nyarugenge (JADF) bamuritse ibikorwa binyuranye birimo iby’ubukorikori, ubugeni, imideri, ibijyanye na serivisi n’ibindi.