Kuri Club Rafiki mu murenge wa Rwezamenyo kuri uyu wa 5 Kanama 2023 hatangirijwe ku mugaragaro gahunda y'Intore mu biruhuko ifite insanganyamatsiko igira iti: "Ubuzima bwiza amahitamo yanjye".

Ni igikorwa cyatangijwe na Bwana Ngabonziza Emmy, Umuyobozi Nshingwabikorwa w’Akarere ka Nyarugenge ari kumwe n'abakuriye Inzego z'urubyiruko, inzego z'umutekano n'imbaga y'urubyiruko rwiganjemo abanyeshuri bari mu biruhuko n’abandi.

Mu ijambo rye, Umuyobozi Nshingwabikorwa w’Akarere ka Nyarugenge, yavuze ko muri gahunda y'Intore mu biruhuko abana n’urubyiruko batozwa Indangagaciro na Kirazira by’Umuco Nyarwanda. Ati: "kirazira ko umwana yishora mu busambanyi, ibiyobyabwenge, ubuzererezi, ubusinzi n’izindi ngeso mbi".

Bwana Ngabonziza Emmy yanasabye intore z'Abanyeshuri ziri mu biruhuko n'urundi rubyiruko gutanga umusanzu wabo mu kubaka igihugu muri ibi biruhuko bubakira abatishoboye, basanira abaturage b’amikoro make amazu n’ibindi bikorwa biganisha ku mibereho myiza y'abaturage.

Abitabira Gahunda y’Intore mu Biruhuko bari mu byiciro bitatu, birimo icy’abana bato bitwa ‘Imbuto’ bo mu mashuri abanza, abiga mu mashuri yisumbuye bitwa ‘Indirirarugamba’, ndetse n’abiga mu mashuri makuru na Kaminuza bitwa ‘Indahangarwa’.

Abatoza b’Intore bamaze guhabwa gahunda y’ibiganiro bizajya bitangwa, imikino izajya ikinwa y’umupira w’amaguru, uw’intoki n’imikino ‘njyarugamba’, imyidagaduro no kugaragaza impano z’imbyino gakondo, imigani, ibisakuzo, imivugo, ibihozo, ubuhanzi n’ubugeni.

Hazabaho n’imirimo itandukanye y’amaboko yo guhanga no gusana ibibuga by’imikino n’imyidagaduro, kubakira abatishoboye no kubaremera, gutera no kubungabunga amashyamba n’ibiti by’imbuto, kubaka no gusana ubwiherero, ndetse n’imirimo y’ubukorerabushake yo kwigisha gusoma no kwandika abatabizi.