Mu bukangurambaga buzamara icyumweru Akarere ka Nyarugenge katangiye uyu munsi tariki ya 18 Nzeri 2023, Ababyeyi barashishikarizwa kwitabira gahunda yo kuboneza urubyaro mu muryango, mu rwego rwo kugira umuryango utekanye haba mu rwego rw’imibereho, ubukungu ndetse no kugira ubuzima bwiza.

Umuyobozi ushinzwe imirimo rusange mu karere ka Nyarugenge, Madamu Murebwayire Betty atangiza iyi gahunda yagaragaje ko gahunda yo kuboneza urubyaro itarobanura ahubwo ireba buri muntu wese wafashe inshingano zo kubyara yaba yubatse cyangwa atubatse. Yagize ati "icyiciro kindi cy'ababyeyi batabana nabo babyaranye (bibana), nabo iyo gahunda irabareba, ireba buri muntu wese wafashe inshingano zo kubyara, nabo tubageraho, ubukangurambaga burakomeza kugirango abatarabisobanukirwa nabo babisobanukirwe kurushaho kuko iyo gahunda nabo ibareba".

Dr. Kiza Francois Regis ukuriye agashami gashinzwe gahunda z’ubuzima bw’umwana n’umubyeyi mu kigo cy’igihugu gishinzwe ubuzima RBC wari witabiriye igikorwa cyo gutangiza ubukangurambaga bwo kuboneza urubyaro muri Nyarugenge yasobanuye bimwe mu byiza byo kuboneza urubyaro birimo no kuba umubyeyi waboneje umwana we akura neza. Yagize ati "Kuboneza urubyaro, ni byiza ku buzima bw'umubyeyi kuko bituma ajya kubyara umubiri umaze gukomera, bituma umubiri we ubasha kubona umwanya wo kongera kwiyubaka muri cya gihe kiri hagati yo kubyara umwana n'undi, bimugabanyiriza ibibazo bitandukanye ku buzima bwe, uko umuntu aboneza urubyaro bigabanya ibyago byo kuba ashobora kwitaba Imana azize inda kuko ibi byago byigongera cyane kubataboneza urubyaro.  

Iyi gahunda y’ubukangurambaga ku kuboneza Urubyaro mu karere ka Nyarugenge yatangirijwe mu Murenge wa Nyamirambo irimo gukorerwa mu bitaro, Ibigo Nderabuzima byose n’amavuriro y’Ibanze (Poste de Santé)