Urubyiruko rurenga 1120 rw’Intore z’Inkomezabigwi icyiciro cya 12 rwatangiye Urugerero rudaciye ingando. Ni urubyiruko rugizwe n’abanyeshuri barangije amashuri yisumbuye rwatangiye urugerero uyu munsi tariki 13 Mutarama rukazasoza tariki ya 28 Gashyantare 2025. Biteganyijwe ko ruzibanda ku bikorwa bihindura ubuzima bw’abaturage, birimo iby’amaboko ndetse n’iby’ubukangurambaga.

IBIZAKORWA

• Kubakira abatishoboye
• Kubasanira amacumbi
• Gutunganya Imirima y’igikoni
• N’ibindi bikorwa by’Iterambere aho batuye
• Bazanatozwa indangagaciro na kirazira ziranga umuco nyarwanda
• Kuganira ku bibazo binyuranye biri aho batuye n’uruhare rwabo mu kubikemura 

Muri rusange, imirimo y’amaboko izakorwa n’uru rubyiruko irimo kubakira abatishoboye, kubaka uturima tw’igikoni, gusana amazu n’ubwiherero bw’abatishoboye no gutunganya imihanda. Uru rubyiruko ruzanashishikariza abaturage kwishyura imisanzu y’ubwisungane mu kwivuza no kwizigamira ku bushake muri gahunda ya Ejo Heza. Bazanakangurira kandi abaturage kubahiriza ingamba zo kwirinda indwara ya Malaria zirimo kuryama mu nzitiramibu, kubakangurira kwishyura imisoro ku gihe no kubakangurira kwirinda ibiyobyabwenge.