Kimwe n’ahandi hose mu gihugu, kuri uyu  wa 08 Werurwe 2023 mu karere ka Nyarugenge hizihijwe Umunsi Mpuzamahanga w'Umugore akaba ari igikorwa cyabereye mu Mudugudu wa Karisimbi, akagari ka Kivugiza mu Murenge wa Nyamirambo  kikitabirwa n’Abayobozi banyuranye barimo Umuyobozi w’Umujyi wa Kigali wungirije ushinzwe Ubukungu n’imibereho myiza Madamu Urujeni Martine, Umuyobozi Nshingwabikorwa Wungirije w’Akarere Madamu Nshutiraguma Esperance, abagize inzego z'umutekano, Abahuzabikorwa b’Inama y’Igihugu y’Abagore mu mujyi wa Kigali no mu karere ka Nyarugenge  n’imbaga y’abaturage

Kwizihiza uyu munsi Mpuzamahanga w’Abagore byaranzwe n’Ibikorwa binyuranye birimo: gusezeranya imiryango yabanaga mu buryo butemewe n'Amategeko, kumurika Ibikorwa by’abagore, Akarasisi k’Abamotar b’abagore batwara moto zikoresha amashanyarazi, kuremera imiryango itishoboye, gutera inkunga amwe mu makoperative y’abagore, kugaburira abana indyo yuzuye n’ibindi bikorwa

Mu ijambo rye, Visi Meya w’Umujyi wa Kigali ushinzwe Imibereho myiza n’Iterambere ry’ubukungu wari umushyitsi mukuru yibukije abitabiriye Kwizihiza umunsi Mpuzamahanga w'Umugore mu karere ka Nyarugenge ko agaciro Umugore afite ubu atagahoranye, yerekana ko harubwo umugore yabuze Ijambo haba mu myigire cyangwa mu muryango we. Yashimiye Ubuyobozi bw'Igihugu burangajwe imbere na Perezida wa Repubulika bwatumye umugore ahabwa agaciro n'uburenganzira bwe haba mu muryango cyangwa mu rwego rw'amategeko, asaba abagore n'abagabo gufatanya bakaba umwe bakubaka Umuryango Ushoboye kandi utekanye. Yanakanguriye abagore kwihatira gukoresha ikoranabuhanga kugira ngo biborohere mu kazi kabo ka buri munsi.