Umurenge wa Nyakabanda uri mu gikorwa cyo Kwibuka ku nshuro ya 31 abazize Jenoside yakorewe Abatutsi. Iyi tariki ya 9 Gicurasi 1994 wabaye umunsi mubi ku Batutsi bari batuye muri ibi bice. Uwari konseye Nyirimanzi Gregoire yashutse Abatutsi abasaba kuva aho bari bihishe abeshya ko hatanzwe ihumure maze Interahamwe zari zahindutse nk’inyamaswa zibicira kuri bariyeri zari ku Ntaraga, Kafe, kuri Kontineri n’ahandi. 

Umutangabuhamya Ntaganira Modeste  yagize ati: ”Ibyacu ni birebire ntaho wahera ubivuga, turashimira Imana yeretse RPF Inkotanyi ibyari biri kutubaho mu 1994 maze nazo zikaza kudutabara”

Umuyobozi wa IBUKA mu murenge wa Nyakabanda, Madamu Usanase Yvone yashimiye Ubuyobozi bw’Igihugu bwashyizeho iki gikorwa cyo Kwibuka kuko ari igikorwa gifasha gukomeza kwegera urubyiruko n'abandi bakigishwa amateka y'ukuri y'Igihugu maze bigafasha mu guhangana n’abayagoreka nkana. Yagarutse ku bugome ndengakamere bwabaye mu gihe cya Jenoside aho yabonye Abatutsi batemagurwa bunyamaswa nta mbabazi. 

Senateri Murangwa Ndangiza Hadidja wari Umushyitsi Mukuru, yihanganishije abarokotse Jenoside asaba urubyiruko n’abandi kugira uruhare mu kurwanya ingengabitekerezo ya Jenoside igaragara mu mbuga nkoranyambaga banyomoza kandi bakamagana imvugo n’inyandiko z’urwango zihagaragara. Yagize ati: “Tugomba kuba ku isonga mu kurwanya ingengabitekerezo ya Jenoside. Twegere abaturage aho batuye tubasobanurira ubumwe n’ubudaheranwa. Dusobanurire urubyiruko amateka, cyane cyane aya Jenoside yakorewe Abatutsi”