Umuyobozi Nshingwabikorwa w’Akarere Bwana Ingangare Alexis kuri uyu wa 16 Nyakanga 2025 yagiranye inama n’Abagize Komite y’Imicungire y’Ibiza ku rwego rw’Akarere ndetse n’abo ku rwego rw’Imirenge baganira ku migendekere y’igikorwa cyo kwimura imiryango yari ituye ahashyira ubuzima bw’abantu mu kaga cyabaye Mata kugeza Gicurasi 2025 banagaruka ku nshingano za Komite z’Imicungire y’Ibiza ku rwego rw’Imirenge (SEDIMAC).

Umuyobozi Nshingwabikorwa w’Akarere yasabye abashinzwe Ibiza mu Karere no mu Mirenge gukomeza gukangurira imiryango yose yaba igituye ahashyira ubuzima bwabo mu kaga kuhimuka bagakiza ubuzima bwabo mbere y’uko imvura itangira kugwa muri Nzeri 2025.

Komite y’Imicungire y’Ibiza igenwa n’Iteka rya Minisitiri w’Intebe N0 98/03 ryo ku wa 17/07/2018 rigena imiterere n’imikorere by’Inzego z’Imicungire y’Ibiza. Bimwe mu byo abagize iyi komite bashinzwe harimo:

• Gukusanya no gusesengura amakuru ajyanye n’imicungire y’ibiza.
• Gukangurira abaturage kugira uruhare mu micungire y’ibiza
• Gushyira mu bikorwa ingamba z’imicungire y’ibiza zafashwe
• Gukurikirana ibikorwa by’ubutabazi no gutanga ubufasha bw’ibanze ku bagwiriwe n’ibiza