Minisitiri w’Uburinganire n’Iterambere ry’Umuryango, Uwimana Consolée ari kumwe n'Umuyobozi Nshingwabikorwa Wungirije w'Akarere ka Nyarugenge Madamu Uwamahoro Genevieve, Umuyobozi w’Ikigo cy'Igihugu gishinzwe imikurire no kurengera umwana (NCDA) n'abandi bayobozi basuye urugo mbonezamikurire rw'abana bato rwo mu Murenge wa Muhima barushyikiriza ibikoresho banaganira n'ababyeyi, abarezi n’abana. Ni igikorwa cyabaye mu gihe hateranye Inama yiga ku iterambere ry'imbonezamikurire y'abana bato irimo kubera mu Kigo cy'Igihugu cy'ibarurishamibare (NISR).

Atangiza iyi nama, Minisitiri w’Uburinganire n’Iterambere ry’Umuryango yagaragaje ko U Rwanda rwashyize Imbonezamikurire y’Abana Bato mu nkingi z’ingenzi z’iterambere ry’Igihugu, kuko imyaka ya mbere y’ubuzima bw’umwana ari yo yubaka ubwonko, imyitwarire, ubushobozi bwo kwiga no kubana n’abandi. Yasabye buri wese kongera imbaraga mu kunoza ireme rya serivisi zitangwa mu ngo mbonezamikurire, kugeza hose ibikorwaremezo n’ibikoresho byifashishwa mu ngo mbonezamukurire no kuzamura no kunoza uruhare rw’umuryango mu mikurire y’umwana