Skip to main content Skip to page footer
Urubuga rwemewe rwa Leta y’u Rwanda
Coat of arms of RwandaAkarere ka Nyarugenge

NYABUGOGO HIZIHIRIJWE UMUNSI MPUZAMAHANGA WAHARIWE GUSUKURA AHO DUTUYE

21 September 2026

Ejo hashize Tariki ya 20 Nzeri 2026, Umujyi wa Kigali wifatanyije n’Isi yose mu kwizihiza umunsi mpuzamahanga wahariwe gusukura aho dutuye.  Ni igikorwa cyabereye mu gace ka Nyabugogo mu Murenge wa Kimisagara, Akarere kacu ka Nyarugenmge. 

Minisitiri w’Ubutegetsi bw’Igihugu Habimana Dominique ari kumwe n’Umuyobozi w’Umujyi wa Kigali Samuel Dusengiyumva, Umuyobozi Nshingwabikorwa w’Akarere ka Nyarugenge Ingangare Alexis, Umuyobozi Nshingwabikorwa w’Akarere ka Nyarugenge Wungirije, Uwamahoro Genevieve n’abandi bayobozi mu nzego zinyuranye bifatanyije n’abaturage b’Umurenge wa Kimisagara maze bakora umuganda wibanze ku gutoragura imyanda, gusiga irangi inzu z’ubucuruzi muri aka gace ka Nyabugogo n’ibindi bikorwa by’isuku n’isukura.

Ibi bikorwa by’umunsi mpuzamahanga wahariwe gusukura aho dutuye bari bifite insanganyamatsiko igira iti: “Kigali izira umwanda”. 

Minisitiri w’Ubutegetsi bw’Igihugu yashimiye abaturage bitabiriye ibikorwa byo gusukura agace k’ubucuruzi ka Nyabugogo, abasaba gukomeza kwimakaza ibikorwa by’isuku n’ahandi hose. Yagize ati: “Isuku ni kimwe mu biranga Abanyakigali n’Abanyarwanda muri rusange. Turasaba abaturage gukomeza ubufatanye n’ubuyobozi mu gukomeza gusigasira isuku muri Kigali n’ahandi mu gihugu”. 

Yibukije abatuye Umujyi wa Kigali ibyo bakwiye kwitaho mu kubunganga isuku harimo: 

  • Kwirinda kujugunya imyanda ahabonetse hose
  • Kugira mu ngo uburyo bwiza bwo kurobanura imyanda ibora n’itabora
  • Kugirana amasezerano n’abatwara imyanda
  • Kwirinda kwitwikira ijoro ukamena imyanda hanze kuko  bihanwa n’amategeko
  • Kwita ku isuku y’aho dukorera n’aho dutuye
  • Ba nyirinzu zikorerwamo ubucuruzi bagomba kugenzura ko inyubako zifite uburyo bwo gufata no gutunganya imyanda iva mu nyubako kandi ko bugikora neza, imiyoboro y’amazi izibuye, imiyoboro y’umwanda wo mu bwiherero, ahagenewe gushyira imyanda, n’ibindi. 

Yongeyeho ati: ”Ntituzareberera na gato abantu basohora imyanda bakayohereza muri za ruhurura cg imigezi n’abatita ku isuku z’inyubako zikorerwamo”. Yasabye abaturage gukomeza ubufatanye bagaragariza ubuyobozi aho babonye ibyo bibazo kugira ngo bikurikiranywe bikemuke.